خزعبلات رونوئية

هذه المرة سأتخلى عن العربية الفصحى ، و أكتب باللهجة العامية المصرية .. لكن قبل أن أفعل ذلك أود التنويه للسادة قراء مدونتي الشخصية ، أن كل ما سيكتب هنا قد يكون مبني على بعض الحقائق العلمية لكنه ليس علميا بالضرورة و إنما الأمر مجرد خزعبلات أفكار ، لذا سأترك لكم حرية القراءة من عدمها، فالأمر لا يخلو من مجرد مزحة عميقة المزاج و الفكر قد تحمل شيئا من الصحة و قد تحمل الكثير من الفانتازيا، و العكس صحيح .. لذا وجب التنويه .. إحتراما مني للسادة القراء المترددين على المدونة.

تحياتي .. الكاتبة

 

حد مرة قعد يفكر كده بينه و بين نفسه هو مخلوق ليه؟ .. عارفة فيه ناس هترد و تقول عشان العبادة .. و نعم بالله أحنا مخلوقين و إحنا بنعبد ربنا و الحمد لله ، لكن بأتكلم عن دورك إنت كبني أدم ربنا خلقه و ميزه عن بقية المخلوقات بالتكليف و الإعمار... فكرت إنت دورك ممكن يكون إيه فى الحياة دي ؟ غير أنك تعمل الصالحات و الحسنات، إنت عارف زي ما أنا عارفة أن الدين المعاملة ، يبقى نبعد شوية عن العبادات كده و نفكر فى المعاملة.. و فى المعاملة دي .. وسع لي مخك حبتين كده و صحصح و أنا باكلمك لأني ناوية كده ألعب شويتين فى عقلك ده .. فلو نعسان أو تعبان ، يستحسن تروح تنام .. أو أقولك .. لأ خليك صاحي معايا شوية و إنت عامل دماغ نعسانة كده هتبقى زي الفل و أنا باكلمك عن الطاقة فى الكون .. أه و النعمة زمبقولك كده .. الطاقة العجيبة الغريبة اللى بتحرك كل حاجة حوالينا كده ... أول ما فكرت إحنا مخلوقين ليه؟ فكرت أنه عشان نعمل أي حاجة لازم يكون عندنا طاقة نعمل بيها أي حاجة؟ و إلا حضرتك أنتي و هو بتاكلوا كل يوم ليه؟ عشان الطاقة يا أساتذة؟ طيب نسيبنا من موضوع الأكل عشان أنا لم بأفتح فى الكلام فيه محدش بيعرف يقفلني خالص... مع ميول سوشية .. نسبة إلى السوشي يعني .. و ساشيمية ، طبعا عرفتوا نسبة إلى إيه ؟ المحشي طبعا ههههه أمال كنتم فاكرين الساشيمي يعني؟!!! مع إنه لذيذ و أعتقد أني واحدة من حبة صغيرين من المصريين اللى ممكن ياكلوا ساشيمي و يستلذوا بيه .. المهم عشان مطولش .. شوفتوا ... قولتلكوا. هاطول فى الأكل .. أنا عارفة اللى بيحصل ..

 نعود للتركيز... تركيز...

أه .. موضوع الطاقة .. انا قعدت كده .. على كنبة يعني ، او كرسي مش مهم .. المهم أني كنت مرتاحة جدا و أنا قاعدة قدام الدفاية و معايا كده كوباية شاي معمولة فى الخمسينة ، و التلفزيون شغال قدامي .. من غير لزمة و الله حتى مش متابعة أى قناة دي اللى كانت شغالة .. المهم قعدت أفكر كده و أستمحص ( أسلوب قديم قوي من زمن العتق القديم بتاع جدتي و جدتها عشان متزعلش) أسمتحصت في إيه؟ فى الناس.. و شخصياتهم .. لقيت كده أن فيه حبة اجاركم الله نار.. و النعمة زمبقولكم كده ، أى حد يقرب منهم بس يتلسع منهم جدا، فظاع بجد، لو قولتلهم صباح الخير هيردوا عليك : " وكمان بتقول صباح الخير؟ و ليه النهاردة جاي تصبح؟ و إشمعن قولتلي صباح الخير و ممدتش إيدك تسلم زي ما سلمت على فلان أو فلانة، لأ إنت قولت صباح الخير و إنت مكشر؟ أو  و إنت متضرر؟ " المهم يعني يحسسوك أنك غلطان من ساسك لراسك انك فكرت فى يوم تصبح عليهم .. الناس دول بقى لو معاك فى الشغل أو فى الحياة عموما هيوقفولك المراكب السايرة .. يعني بنفس المنطق ، تخيل كده رحت تطلب منهم حاجة يعملوهالك ، دباسة ورق ... أهه مثل سهل و بسيط .. الناس عادة بتطلب دباسة الورق ليه عشان تدبس الورق .. سبحان الله !!

 دول بقى لو طلبت منهم دباسة ورق .. هيدبسوك أنت شخصيا !!!!

صدقوني .. الأول هيسألوا ، ليه؟ و عشان إيه؟ بتطلب منهم دباسة؟ و إن كان عندك دباسة الأول موجودة؟ و حالتها إيه؟ و هل معاك ورق تدبسه؟ و عدده كام؟ و بتاع إيه؟ و مكتوب فيه أيه؟ و ليه جاي تدبس دلوقتي؟ و طلبت منهم هم تحديدا التدبيس ليه؟ .... قولي بقى إتدبست يا حلو ؟!!!

خليهم كده على جنب بس إفتكرهم كويس قوي خالص جدا مالص..

 ناس تانية بقه، على وشهم إبتسامة .. بس إيه خلي بالك ... صوتهم هادي.. خلي بالك بقولك.. ريحتهم حلوة ... لالألأ متنخدعش.. قرب كده منهم شوية .. هيعملولك كل حاجة أنت طلبتها، عشان دول كيوت يعني، أه طبعا كيوت .. و أنا أقدر أقول حاجة غير كده.. بس الكيوت دول؟ قصاد كل دبوس دبس بيه ورقة أو رزمة ورق ، هيجولك يطلبوا منك عشر أضعاف اللى أنت طلبته.. تعرف بقى تقولهم لأ؟

إتفضل .. وريني شاطرتك معاهم.. دول أشطر مني و منك .. و كيوت .. و ريحتهم حلوة الصراحة مقدرش أنكر، كمان بيلبسوا حلو فى معظم الأحيان و الله أعلم ..

خليهم برضه على جنب ..

 كمل معايا .. لأ متزهقش .. الليلة طويلة يا باشا و إحنا لسه فى بداية السكة ..

 باتكلم كده ليه؟ ... معرفش .. اهي طلبت مني أتكلم كده.. تقريبا متأثرة بلغة السوشيال على لغة الشوارع سوري.. قصدي لغة القهاوي، سوري سوري، لغة الكافيهات، سوري هي بصراحة بقت لغة دارجة كده عندنا ملهاش طريقة محددة أو مكان منتشرة فيه ، ده انا كنت حتى معدية من جنب مدرسة كده و سمعت لفظ كده جيه فى وشي مرة واحدة خبطني كده ،، مبقتش عارفة أبص على الطريق و اللا ألف و أرجع، و اللا أضرب اللى رماه بشنطتي؟ و اللأ أعمل إيه بالضبط .. سيبك من كل ده .. كمل بس فيه أنواع تانية من الناس.. دول طاقات متعددة المواهب و الإستخدامات ..

 أنا وقفت عند فين؟.. ثواني طيب هاشرب بق من فنجان القهوة أستجمع أفكاراتي الخزعبلية و أرجع تاني كده ... الله حلوة فعلا

فيه ناس تانية بقه ، إفتكرت ، دول فى عالم تاني خالص خالص خالص و مالص مالص مالص، دول فى عالم طنطي، و مامتي، و خالتي، و سوزان مين معرفش ، و ميرنا، و غادة و تسنيم، و جنب منهم فيه رجالة برضه من عالم تاني خالص مالص ،مرة واحدة كفاية عليهم، برضه من عالم طنط، و ماما ، و عمتي، و خالتي، و مروان، و أشرف ، و صاحبي و صاحبتي..

ليه فى عالم تاني، لأنهم فى الواقع مش تعبانين فى العالم اللى هم فيه بحاجة.. دول ليهم وظيفة واحدة بس .. "بيزنس شو" يعني البيزنس القائم على الأستعراض .. و فيه قاعدة ذهبية جدا هي مفتاح الأساس لكل حاجة فيه .. كلما زدت فى الفرنجة، و المظاهر، و البهرجة، و الدفع ، كلما حصدت مثلما دفعت و زيادة، و كلما لعبت مع الكبار، كلما صرت كبيرا مثلهم.. فالصغيرين و المبتدئين و الهواة ملهومش أى مكان هنا.. ممنوع الإقتراب أو التصوير.. كمان مجتمعهم رافض ناقد غربال .. بيصفي على طول .. اللى على نفس الموجة و نفس اللغة هو بس اللى مسموح له الإنضمام و الإقتراب و اللهو، أو الجد .. مش فارقة كتير..

 دول بقى .. تيجي تطلب منهم حاجة، يبصولك الأول كده، يقيموك .. بعقلهم و هم ساكتين، بس فيه إبتسامة، تاخدك كده على خوانة.. و تنزلك بكلام كله دبلوماسية و الحقيقة مقنع،، يعني أنا كبهير .. باقتنع ،، و أرجع أسأل نفسي هو أنا جيت هنا ليه؟ و بأطلب أزاى الحق ده  أو الطلب ده؟ و إزاى فكرت أعمل كده؟ ما إن شاء عن الورق اللى في إيدي ما إتبدس؟ بس مكنتش أتعدى كده حدودي و أروح أكلم حد و اطلب دباسته ؟

مع إن الدباسة دي أصلا عهدة عامة ، بس هو كده، بتروح تلاقيهم محضرينلك عريضة إقناع تبرر ليه الدباسة دي لازم فقط تكون حكر عليهم؟ و إن كان عندك شك .. تحب أقنعك ؟ ما أنا أصلي إقتنعت؟

 خليني احكيلك يا سيدي؟

 مينفعش تيجي تدبس ورقك هنا؟ قول لي ليه؟

لا مش حجة هي إن الورق لازم يتدبس؟ و لا أن الدباسة اللى عندكم فضيت من الدبابيس؟ إطلاقا؟ نو؟ إبسلوتلي؟

 يو هاف تو ثينك توايس؟ مينلي بيفور يو توك؟ دو يو اندرستاند؟

 مش مهم خليني انزل بالترجمة؟

كل مكان عنده مخصص مالي معين، و متوزع على الستيشنوري بتاعته؟ و كمان لازم ناخد بالنا من البيئة؟ و نكون متحضرين.. ويذأوت إني أننيسيستي، مش لازم الواحد يستهلك ال" ريسورسز"، فاهمني ؟

 يعني بدون أى حاجة أو ضرورة ملحة مش لازم تستهلك الموارد بتاعتك و تخلصها؟!

كمان مفيش مجاملة فى الموضوع ده ، و إلا يبقى إهدار المال العام؟ و أنت أكيد مش عاوز تهدر المال العام؟

 فين مسؤليتك من التطور و التقدم ، و النمو؟ من فضلك إتصرف ، احنا يا دوب الدبابيس على قد المكتب بتاعنا؟ كمان هم مش بيرضوا يدونا ازيد من المخصصات الدبوسية دي؟ و بيقولوا عننا إننا مرفهين؟ عشان شايفين عندنا، كيتل مية، و كوفي ميكر، و سندوتش ميكر، و تكييف، و ميكروويف، و تلاجة ، و هيتر، و كل الحاجات دي إحنا جمعناها من فلوسنا مع بعض ، ده غير السجادة و الموكيت ده، و النتريه ده ، كلها من بيوتنا و جيوبنا، و لو دورت على أصل الدباسة الحلوة دي ، هتلاقينا كمان إحنا اللى جايبينها؟

سوري .. ميفنعش.. صدقني لو كان ينفع كنت خليتك تدبس.. بس .. إتس أوت أوف ماي هاند يعني؟

أى كانت هيلب يو أوت؟

و بمنتهى العملية .. يلفوا رؤوسهم و يبدأوا يتكلموا فى أى حاجة تانية .. بعيدة تماما عن وجودك.. انت بقيت هوا.. مش واخد بالك و اللا إيه؟

 و هم خمس دقايق لو فضلت واقف بعدها، هتلاقي نظرات، همهمات، ثم كلمات بالأعين كلها بتشاور عليك و نفسها تقول بصوت عالي: فالجر؟؟ بيئة يعني.. بس محدش بيقول .. أنما بتحسها صدقني.. يعني هتعرف فبلاش يجيلك فضول.. عادة فى المرحلة دي في ناس بتمشي كده و هي محروق دمها.. و فى ناس تانية .. و ده النوع اللى كنت لسه جايالك فى الكلام عنه .. ولا بيفرق معاه .. صدقني.. فالجر، مش فالجر، و لا همه؟ هو عنده مصلحة هيقضيها بعون الله، وافقت ، رفضت، غلط صح، مش مهم، و يا سلام بقى لو كانت ضد القوانين و اللوائح و كانت غلط، هتبقى سعادته كبيرة لحد متتخيلوش،، ليه .. إسمها فهلوة.. أو نجاح.. أو أنا بانفذ اللى  دماغي و محدش له كلمة عليا، أو أنا فوق القانون، فى العادة الناس دي عارفة ديتها فى التعامل مع الحبة اللى لسه متكلمة عنهم ..

اصلي مبحبش اجيب سيرة حد زي ما أنتوا شايفين كده .. فى حالي من يومي .. ههههه

 المهم ديتها إيه؟ أنا هاقولك الصنف الأخير ده عارف أنه لو زعق، و إستخدم كلمتين خارجتين، رايحين يتفسحوا شوية يعني، أمال إنت فهمت خارجتين ازاى؟  إفهمها بطريقتك ههه

بتوع العالم التاني ، هيتكسفوا، و يحسوا إنهم بيتهزأوا، و هيبقوا عاوزين يلموا الدنيا كده و من سكات ، لا مين شاف و لا مين دري،، عشان الأستاذ برستيج ميتبعترش فى الأرض، لأنه لو إتبعتر مبيتلمش،، نسيت أقولك المجتمع ده بيحب المظاهر، فلما بتبوظ بيبوظ معاها رأس ماله، و الصنف الأخير ده بتاع " الإشارة حمرا... حمرا مين؟ وواكلين فول على الصبح على رأي الله يرحمه سمير غانم، عارفين ده كويس جدا" و النتيجة فى المباراة فى الشوط الأول عادة لأنه مبيبقاش فيه شوط تاني .. بتحسم لصالح الناس بتوع الحمرا مين؟!!!

يا ريتهم بقى بيسكتوا عند أنهم حققوا اللى فى نفسهم و دبسوا ورقهم فى المكتب الفخم؟ لا؟!!

 بيروحوا يتفشخروا،، دول ماقدرش أقول عليهم إلا المصطلح ده، حاسة بيتباهوا ديليكا شوية على اللى بيعملوهههههه

 فلما يتفشخروا، هيتفشخروا قدام مين.. ؟ قدام الغلابة؟ بتوع  الإلتزام و الأنضباط و الهدوء،، عادة الناس دي ، لما بتلاقي اى حاجة بتلخبطلهم روتينهم اليومي المحفووظ  و المكرر، بيحسوا بصدمة، و يعانوا من رهاب التغيير، و الأماكن العالية و المغلقة و كل أنواع الرهاب اللى تعرفه ، لمجرد التغيير، ناس ماشية بالعافية ، بتتعود ببطء على الحاجة، و لما بتعملها بتحفظ طريقة عملها إزاى، فلما تيجي تغير حاجة بينسوا أصلا الطريقة، و بياخدوا وقتهم عقبال ما يرجعوا تاني يتعلموها بالطريقة الجديدة، المهم الناس دي، بتلاقي نفسها ماشية جنب الحيط، لا مشكل و لا مشكول، و لا مشاكلين،، فيجوا بقه و يتفشخروا قدامهم.. تفتكر إحساسهم إيه؟ إحساسهم بالغلب و الغلبة و الإنهزام؟

و فى لحظة مجنونة،،، يطلعوا كده من هدوءهم و يطالبوا بالمساواة ,, فطبعا يترفضوا.. متقلقش .. عادي .. بيرجعوا تاني يقعدوا على نفس الكراسي بتاعتهم ، و يقولو لك حاولنا و معرفناش، يعني هنتخانق مثلا، خليهم يقبلوها على نفسهم ، حسبنا الله و نعم الوكيل..

 

يااااه ...

لسه القايمة طويلة ..

وخزعبلاتي كتيرة .. هاكملها مرة تانية أول ما أروح أضبط فنجان قهوة معتبر تاني كده و أجيلكم ..

سلام

ملحوظة // أنتظر تعليقاتكم، هل فى محيط حياتك بعض من هذه النماذج؟ أكتب عن تجربتك و شاركها معنا فى التعليقات؟